ಘಝಲ್: ನಿನ್ನದೇ ಹೆಸರು

ಘಝಲ್:

ನಿನ್ನದೇ ಹೆಸರು 

ಸುಳಿಸುಳಿವ ತಿಳಿಗಾಳಿಗೆ ಕಂಪಿಸುವ ಅಲೆಗಳಲಿ ನಿನ್ನದೇ ಹೆಸರು

ಹೊಳೆಹೊಳೆವ ನೀರ ಅಲೆ ಅರಳಿಸುವ ಹೂಗಳಲಿ ನಿನ್ನದೇ ಹೆಸರು

ಎಳೆಎಳೆಯ ಬಿಸಿಲಲಿ ಹೊಸಚಿಗುರು ತೆರೆವ ಶಿಶಿರದ ಆ ಕಿರಣದಲಿ 

ಚಿಲಿಪಿಲಿಯ ಇಂಚರದ ಹಕ್ಕಿಗಳ ಹಾಡಿನಲಿ ನಿನ್ನದೇ ಹೆಸರು

ಹನಿಹನಿಸಿ ನೆಲತಣಿಸಿ ಮನಮುದಿಸಿ ಸಾಗುವ ಮುಗಿಲಿನಾ ಮಡಿಲಲಿ

ಬಗೆಬಗೆಯ ಬಣ್ಣದ ಆ ಕಾಮನ ಬಿಲ್ಲಿನಲಿ ನಿನ್ನದೇ ಹೆಸರು

ನೆಗೆನೆಗೆದು ಧುಮಕಿ ಜುಳುಜುಳನೆ ಸರಿಯುವ ನದಿಗಳ ಆ ಬಳುಕಿನಲಿ 

ಅಲೆಅಲೆಯ ಅಪ್ಪುಗೆಗೆ ದಡಮಿಡಿವ ಸಾಗರದಲಿ ನಿನ್ನದೇ ಹೆಸರು

ಚಳಿಚಳಿಯ ಇರುಳು ಉಳಿಸಿದ ಇಬ್ಬನಿಯ ಮಸುಕಿನಾ ನಸುಕುಗಳಲಿ

ನೆನೆನೆನೆದು ರಾಧೆಯ ಕರೆಯುವ ಆ ಮುರಳಿಯಲಿ ನಿನ್ನದೇ ಹೆಸರು 

ಮುರಳಿ ಹತ್ವಾರ್

೧೯/೦೪/೨೦೨೦